༄།།འཛམ་གླིང་བྱང་ཕྱོགས་ཐུབ་པའི་རྒྱལ་ཚབ་དཔལ་ས་སྐྱའི་ཁྲི་འཛིན་ཞེ་གཉིས་པ་༧སྐྱབས་མགོན་༧གོང་མ་ངག་དབང་ཀུན་དགའ་བློ་གྲོས་རིན་ཆེན་འཇིགས་མེད་ཕྲིན་ལས་སམ་༧སྐྱབས་མགོན་རཏྣ་བཛྲ་མཆོག་ནི་༧གོང་མ་ཁྲི་ཆེན་རྡོ་རྗེ་འཆང་ངག་དབང་ཀུན་དགའ་ཐེག་ཆེན་དཔལ་འབར་ཕྲིན་ལས་བསམ་འཕེལ་དབང་གི་རྒྱལ་པོ་མཆོག་དང་ཡུམ་བཀྲ་ཤིས་ལྷ་སྐྱིད་ཀྱི་སྲས་སུ་རབ་བྱུང་བཅུ་དྲུག་པའི་ཤིང་སྟགཕྱི་ལོ་༡༩༧༤ཟླ་བ་༡༡ཚེས་༡༩ཉིན་རྒྱ་གར་བྱང་ཕྱོགས་ལྡེ་ར་རྡུན་དུ་མཚན་མཆོག་གསུམ་ལྡན་གྱི་རིགས་སུ་སྐུ་བལྟམས།སྐུ་འཁྲུངས་རྗེས་སུ་ལྗགས་ལ་དྷཱི་ཡིག་འབྲི་བ་སོགས་ཤེས་རབ་རྣོ་བ་ཡོང་བའི་ཆོ་ག་མཛད།དགུང་ན་ཆུང་ངུའི་དུས་སུ་ཡབ་རྗེ་རྡོ་རྗེ་འཆང་གིས་དབུས་པའི་བླ་མ་དགེ་བའི་བཤེས་གཉེན་མང་པོའི་དྲུང་ནས་དབང་ལུང་མན་ངག་མང་པོ་གསན།དགུང་ལོ་དྲུག་ཏུ་བཞེས་པ་ན་གང་གི་ཡོངས་འཛིན་རྒན་རིན་ཆེན་བཟང་པོ་ལགས་ཀྱི་ཞལ་སྔ་ནས་ཐོག་མར་བོད་ཡིག་འབྲི་ཀློག་ནས་དབུ་བཙུགས་ཏེ།སྔོན་འགྲོའི་ཆོས་སྤྱོད་ཐུགས་འཛིན།གཞན་ཡང་སུམ་རྟགས་དང་།དག་ཡིགའདོན་རྟ་དབྱངས་སོགས་རིམ་པས་གསན་སྦྱོང་མཛད།ས་ལུགས་རང་གི་ཐུན་མོང་མ་ཡིན་པའི་ཕྱག་ལེན་ཕྲ་མོ་སྐོར་འབུད་དཀྲོལ་རྡུང་གསུམ། ཐིག་རྡུལ་ཚོན་ཚུན་ཆད་སྦྱངས་བརྩོན་ཚུལ་བཞིན་མཛད། གང་ཉིད་དགུང་ལོ་བཅུ་གཉིས་སུ་ཕེབས་པ་ཕྱི་ལོ་ ༡༩༨༧ ལོར་བྱེས་ཀྱི་དཔལ་ས་སྐྱའི་གདན་སའི་འདུས་ཚོགས་སུ་བདུན་པའམ་ཕུར་སྒྲུབ་ཚོགས་འདོན་དབུ་མཛད་རྒྱུགས་འབུལ་རྩེར་ཕུད་མཛད། ཕྱི་ལོ་ ༡༩༩༠ ལོར་དཔལ་ས་སྐྱའི་མཐོ་རིམ་སློབ་གྲྭར་སློབ་བཞུགས་གནང་ནས་མཁན་ཆེན་ལེགས་བཤད་ཀུན་དགའ་འམ་མིག་དམར་ཚེ་རིང་གཙོ་བོར་གྱུར་པའི་དགེ་བའི་བཤེས་གཉེན་དུ་མའི་དྲུང་ནས་ཚད་མ་དང་། དབུ་མ། ཤེར་ཕྱིན། མངོན་པ། འདུལ་བ། སྡོམ་གསུམ་སྟེ་པོད་ཆེན་དྲུག་གམ་གྲགས་ཆེན་བཅོ་བརྒྱད་དང་། སྤྱི་ལྗོན་བརྟག་གསུམ་དང་བཅས་པར་གསན་བསམ་རྒྱ་ཆེར་མཛད་དེ་ལོ་རེའི་རྒྱུགས་འབུལ་ཨང་རིམ་ཀྱང་རྩེར་གསོན་དུ་བཞེས་ཤིང་མཐར་ཕྱི་ལོ་ ༡༩༩༨ ལོར་བཀའ་བཅུ་པའི་མཚན་གནས་བཞེས་ཀྱིས་རེ་ཞིག་སློབ་ཐོན་མཛད། དེ་ཡང་སྔོན་དུས་སུ་འཁོན་གྱི་སྔགས་འཆང་བླ་མ་ས་སྐྱ་པ་ཆེན་པོ་ཀུན་དགའ་སྙིང་པོ་དང་། སློབ་དཔོན་རིན་པོ་ཆེ་བསོད་ནམས་རྩེ་མོ་སོགས་སློབ་གཉེར་བ་དཀྱུས་མའི་ཚུལ་དུ་ཕྱོགས་དང་རིས་སུ་མ་ཆད་པའི་བཤད་གྲྭ་དང་དགེ་བའི་བཤེས་གཉེན་དུ་མའི་དྲུང་དུ་གུས་པར་བསྙེན་ནས་དེ་དག་ཚུལ་བཞིན་བསྟེན་སྟེ་མདོ་སྔགས་རིག་གནས་དང་བཅར་པར་གསན་བསམ་ཕྱོགས་མེད་རྒྱ་ཆེར་མཛད་པའི་སྲོལ་ཡོད་ཀྱང་དུས་ཕྱིས་སུ་རིམ་བཞིན་ཉམས་རྒུད་ལྟ་བུར་གྱུར་ཀྱང་རིན་པོ་ཆེ་འདི་ཉིད་ཀྱིས་སློབ་གཉེར་བ་དཀྱུས་མ་ཇི་བཞིན་ཚོགས་དང་། འཛིན་གྲྭ་ཆོས་རྭ་ལ་སོགས་འགྲིམས་ནས་སློབ་གཉེར་ལ་སྡུག་རུས་ཆེར་བསྐྱེད་མཛད་དེ་རིང་པོར་མ་ཐོགས་པར་མཁས་པར་གྱུར། སློབ་གཉེར་མཛད་པའི་སྐབས་སུ་གཞུང་གང་དང་གང་ཡིན་ནའང་གཞི་གཙོ་བོ་བཞག་སའི་འགྲེལ་པ་དེ་ཐུགས་འཛིན་མཛད་ཅིང་། འགྲེལ་པ་གཞན་མང་པོར་ཡང་ནས་ཡང་དུ་ཐུགས་ཞིབ་གནང་གི་ཡོད་ལ། གཞུང་གི་གནད་གང་ཞིག་ལ་ཐུགས་དོགས་བྱུང་བ་ན་མཁན་པོ་དང་སྐྱོར་དཔོན་སོགས་ལ་འཕྲལ་མ་འཕྲལ་མར་དོགས་འདྲི་གནང་བ་དང་། གཟིམ་ཤག་ཏུ་གཞུང་གི་གནད་མང་པོ་སྐྱོར་དཔོན་སོགས་དང་བགྲོ་གླེང་གནང་གི་ཡོད། ཚོགས་དང་ཆོས་རྭ་སོགས་ཀྱི་སྐབས་གདིང་བ་དམར་ཚལ་ཙམ་གཟིགས་པ་ན་འཕྲལ་དུ་བསྒྲུགས་ནས་ཟུར་དུ་འཇོག་པ་ལས་ནམ་ཡང་འགོམ་པར་མི་མཛད། དགེ་འདུན་རྣམས་གསོ་སྦྱོང་འཚོགས་ནས་གཙུག་ལག་ཁང་ལ་བསྐོར་བར་བྱོན་པའི་ཚེ་ལྐོག་ཏུ་གཟིམ་ཁང་གི་སྒེའུ་ཁུང་ནས་དགེ་འདུན་པའི་ཕྱོགས་ལ་གཟིགས་བཞིན་ཐུགས་སྨོན་གནང་གི་ཡོད་དོ། གཞན་ཡང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོའི་དྲུང་ནས་བཀའ་དབང་གསུང་ཆོས་དུ་མ་གསན་པ་དང་། མགོན་པོ་གང་གི་ཡབ་དཔལ་ས་སྐྱའི་༧ཁྲི་ཆེན་རྡོ་རྗེ་འཆང་ངག་དབང་ཀུན་དགའི་ཞལ་སྔ་ནས་སྔ་ཕྱིར་གསུང་ངག་ལམ་འབྲས་ཚོགས་བཤད་དང་། སློབ་བཤད་ཚར་དུ་མ་དང་། དཔལ་ས་སྐྱའི་གསེར་ཆོས་བཅུ་གསུམ། རྡོ་རྗེ་འཇིགས་བྱེད། མགོན་པོ་ཆེ་ཆུང་ལ་སོགས་པ་ས་སྐྱ་པར་ཚད་ཀྱིས་གྲགས་པའི་སྙན་བརྒྱུད་དུ་མ་དང་། ཕྱི་ལོ་ (༡༩༨༧ ལོ་ནས་ ༢༠༠༠ )ལོ་བར་དགུན་དུས་སུ་ཟླ་བ་གཉིས་ཙམ་རིང་བྱེས་ཀྱི་ངོར་མ་དགོན་དུ་རྒྱུད་སྡེ་ཀུན་བཏུས་ཀྱི་དབང་ཆ་ཚང་ཡོངས་སུ་གསན་བཞེས་མཛད། ཕྱི་ལོ་ ༡༩༩༤ ལོར་བལ་ཡུལ་ཐར་ལམ་དགོན་དུ་སྒྲུབ་ཐབས་ཀུན་བཏུས་ཆ་ཚང་ལ་སོགས་པ་དབང་དང་མན་ངག་མང་པོ་གསན་པས་ཁྲི་ཆེན་རྡོ་རྗེ་འཆང་ནི་རྩ་བའི་བླ་མ་རྣམས་ཀྱི་ནང་ནས་གཙུག་གི་ནོར་བུ་གྱུར་པ་དེ་ཡིན། དེ་མཚུངས་སྐྱབས་རྗེ་བདེ་བར་གཤེགས་པ་བཅོ་བརྒྱད་ཁྲི་ཆེན་མཁྱེན་རབ་ལེགས་བཤད་རྒྱ་མཚོ་མཆོག་དང་། སྐྱབས་རྗེ་ངོར་ཀླུ་ལྡིང་ཆེན་འཇམ་དབྱངས་བསྟན་པའི་ཉི་མ་རྣམ་གཉིས་གཙུག་ཏུ་བཀུར་ནས་དབང་ལུང་རྗེས་གནང་མང་དུ་གསན། ལྷག་པར་རྒྱལ་བའི་གསུང་རབ་སྤྱི་དང་དཔལ་ས་སྐྱའི་མདོ་སྔགས་ཀྱི་གཞི་ལམ་འབྲས་བུའི་རྣམ་གཞག་ལ་ནང་བྱན་ཆུད་པ་མཁན་ཆེན་བདེ་བར་གཤེགས་པ་ཨ་པད་རིན་པོ་ཆེའི་ཞལ་སྔ་ནས་དཔལ་ཀྱཻ་ཡི་རྡོ་རྗེའི་རྩ་བའི་རྒྱུད་བརྟག་པ་གཉིས་པ་དང་། བཤད་རྒྱུད་རྡོ་རྗེ་གུར། མན་ངག་གི་རྒྱུད་སམ་བྷུ་ཊི། (ལམ་འབྲས་སྲས་དོན་མ།) ངོར་ཆེན་ཀུན་མཆོག་ལྷུན་གྲུབ་ཀྱིས་མཛད་པའི་ཚུལ་གསུམ་མཛེས་རྒྱན། ལྗོན་ཤིང་མཛེས་རྒྱན། རྒྱུད་གསུམ་མཛེས་རྒྱན་རྣམས་ཀྱི་རྒྱུད་བཤད་མན་ངག་དང་། ཀུན་མཁྱེན་གོ་རམ་པའི་བཀའ་འབུམ་ལས་མདོ་སྐོར་གྱི་ལུང་སོགས་གསན་ཞིང་ཞིབ་པར་སྦྱངས་པ་དང་། དེ་མིན་བླ་མ་དགེ་བའི་བཤེས་གཤེན་དུ་མའི་དྲུང་ནས་དབང་ལུང་མན་ངག་སོགས་མང་པོ་གསན་ཅིང་ཉམས་སུ་བཞེས་པར་མཛད་པས་བསྟན་པའི་བདག་པོར་གྱུར། ཕྱི་ལོ་ ༢༠༠༢ ལོར་ཡབ་ཚང་ཚ་སྤྲུལ་ཚང་དང་། ཡུམ་ས་འདུ་ཚང་གི་སྲས་མོ་སྐལ་ལྡན་སྒྲོན་སྐྱིད་ལགས་ཁབ་ཏུ་བཞེས།སྔ་ཕྱིར་གདུང་སྲས་གཅིག་དང་། རྗེ་བཙུན་མ་གཉིས་འཁྲུངས་ཤིང་། ཁོང་རྣམས་འཚར་ལོངས་དང་། ཤེས་ཡོན་ལ་ཐུགས་འཕུར་ཆེར་བསྐྱེད་གནང་བཞིན་པ་བཅས་དང་།དགུང་ལོ་བཅུ་གཉིས་ཡན་མན་བཟུང་ནས་ཡི་དམ་དང་ཆོས་སྐྱོང་ཁག་གི་བསྙེན་པ་བསྐྱལ་གནང་བ་དང་། ལྷག་པར་ཕྱི་ལོ་ ༢༠༠༥ ཟླ་བ་བརྒྱད་རིང་དཔལ་ཀྱཻ་ཡི་རྡོ་རྗེའི་གཞི་བསྙེན་གྱི་བཅད་རྒྱ་དམ་པོ་བཞུགས། ཕྱི་ལོ་ ༢༠༠༦ ནས་ཀ་ལོན་སྦུག་ཏུ་ས་སྐྱ་བརྩེ་ཆེན་འཕྲིན་ལས་དར་རྒྱས་གླིང་བཞེངས་འགོ་བཙུགས་ནས་ཕྱི་ལོ་ ༢༠༡༥ ལོར་ལེགས་པར་གྲུབ་ནས་དགའ་སྟོན་རྟེན་འབྲེལ་མཛད་སྒོ་དང་འབྲེལ་སྐྱ་སེར་ཆིག་སྟོང་ལྔ་བརྒྱ་ཙམ་འདུས་པར་ལམ་འབྲས་སློབ་བཤད་གནང་། རྒྱུན་དུ་དགོན་པར་དགེ་འདུན་ཞལ་གྲངས་བརྒྱ་དང་བརྒྱད་བཅུ་ཡོད་པར་འདོན་རྟ་དབྱངས་དང་། ཕྱི་ནང་གི་རིག་གནས། གཞུང་ཆེན་ཁག་བཅས་ལ་སློབ་གཉེར་བྱེད་བཞིན་ཡོད། ཕྱི་ལོ་ ༢༠༡༦ ལོ་ནས་དགུན་དུས་སུ་ཟླ་བ་གཅིག་རིང་ས་སྐྱ་མཐོ་སློབ་ཏུ་མཁན་སློབ་ཡོངས་ལ་གསང་སྔགས་སྐོར་གསུང་ཆོས་འབུ་འཚུགས་ཀྱིས་སློབ་དཔོན་རིན་པོ་ཆེ་བསོད་ནམས་རྩེ་མོས་མཛད་པའི་རྒྱུད་སྡེ་སྤྱི་རྣམ་དང་། ཕྱི་ལོ་ ༢༠༡༧ ལོར་རྗེ་བཙུན་གྲགས་པ་རྒྱལ་མཚན་གྱིས་མཛད་པའི་མངོན་རྟོགས་ལྗོན་ཤིང་། ཕྱི་ལོ་༢༠༡༨ ལོར་རྩ་རྒྱུད་བརྟག་གཉིས། ཕྱི་ལོ་ ༢༠༡༩ ལོར་ལམ་འབྲས་ཇོ་ལྕགས་མ་བཅས་སྔ་ཕྱི་རིམ་པས་གསུང་ཆོས་གནང་། ཕྱི་ལོ་་༢༠༠༩ ནས་་༢༠༡༡ བར་ལོ་ལྟར་ཟླ་བ་གཉིས་ཙམ་རིང་སྤུར་རུ་ལྦ་ལ་ས་སྐྱ་མ་དགོན་ཐུབ་བསྟན་རྣམ་རྒྱལ་གླིང་དུ་རྒྱུད་སྡེ་སྤྱི་རྣམ་དང་། མངོན་རྟོགས་ལྗོན་ཤིང་། རྩ་རྒྱུད་བརྟག་གཉིས། ཀྱཻ་རྡོར་རྣམས་གསུངས། ཕྱི་ལོ་ ༢༠༡༠ དང་ ༢༠༡༢ ལོར་རྗོང་གསར་བཤད་གྲྭ་ཆོས་ཀྱི་བློ་གྲོས་སུ་རྡོ་རྗེ་གུར་གྱི་རྒྱུད་གསུངས། ༧ སྐྱབས་མགོན་༧གོང་མ་ཁྲི་ཆེན་རིན་པོ་ཆེས་ད་ལྟ་སྒྲོལ་མ་ཕོ་བྲང་དང་ཕུན་ཚོགས་ཕོ་བྲང་གི་༧སྐྱབས་མགོན་རྣམ་པ་ཞལ་བཞུགས་པའི་སྐབས་འདིར་མ་འོངས་པར་དཔལ་ས་སྐྱའི་ཁྲི་འཛིན་བསྐོ་གཞག་གནང་ཕྱོགས་ཐད་ཕོ་བྲང་གཉིས་བཀའ་སྡུར་གྱིས་གྲོས་ཆོད་ཡག་པོ་ཞིག་འཇོག་མ་ཐུབ་ན་མ་འོངས་པར་ཉིན་ཞིག་གླུ་བུར་དུ་བདག་ཁྲི་བསྐོ་གཞག་གནང་དགོས་བྱུང་ཚེ་ཚང་མར་དཀའ་ངལ་འཕྲད་གཞིར་འགྱུར་སྟབས། ད་ལྟ་ང་ཚོ་ཚང་མ་ཡོད་པའི་སྐབས་འདིར་གདུང་སྲས་ཚང་མ་སྐུ་ཚད་རྫོགས་པ་དང་སྐུ་ཡོན་གསན་སྦྱོང་ཕལ་མོ་ཆེ་གྲུབ་དང་འགྲུབ་བཞིན་རེད། དེས་ན་གདུང་སྲས་འོས་ཆོས་ཚང་བ་རྣམ་པས་རྒན་རིམ་བཞིན་ས་སྐྱའི་ཁྲི་འཛིན་གྱི་ཐུགས་འགན་བཞེས་པ་ཡིན་ན། ང་ཚོའི་ངོས་ནས་རྒྱུས་ཡོད་ལམ་སྟོན་དང་ཕྱག་རོགས་རོགས་སོགས་ཞུ་རྒྱུར་ཐུགས་ཕན་གསོས་པའི་དགོངས་འཆར་༧བདག་ཆེན་རིན་པོ་ཆེར་ཞུས་ནས་ཕོ་བྲང་རྣམ་གཉིས་གྲོས་བསྡུར་གནང་ནས་གྲོས་ཆོད་བཞག་པ་བཞིན་ཕྱི་ལོ་ ༢༠༡༧ ཟླ་བ་ ༣ ཚ་༩ ཉིན་རྒྱ་གར་བྱང་ཕྱོགས་སྤུ་རུ་ལྦ་ལར་རྟེན་གཞི་བྱས་པའི་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་དུ་དཔལ་ས་སྐྱའ༧ཁྲི་འཛིན་ཞེ་གཅིག་༧སྐྱབས་མགོན་༧གོང་མ་ཁྲི་ཆེན་རིན་པོ་ཆེ་དབུ་བཞུགས་ཐོག་དཔལ་ལྡན་དགའ་ལྡན་ཕོ་བྲང་དང་རྒྱལ་བ་ཀརྨ་པའི་སྐུ་ཚབ། དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་གྱི་འགན་འཛིན་རྣམ་པ། ས་སྐྱའི་ཕོ་བྲང་རྣམ་གཉིས་ཀྱི་གདུང་སྲས་དང་གདན་ས་ཁག་གི་མཁན་པོ་དང་ཞབས་དྲུང་རྣམ་པས་དབུས་སྐྱ་སེར་མང་པོ་ལྷན་དུ་འཛོམས་ནས་དགའ་དད་སྤྲོ་གསུམ་གྱིས་འཁོན་གདུང་རཏྣ་བཛྲ་རིན་པོ་ཆེ་མཆོག་དཔལ་ས་སྐྱའི་ཁྲི་འཛིན་ཞེ་གཉིས་པར་མངའ་གསོལ། ལོ་དེ་རང་ལ་རཱ་ཇ་པུར་ས་སྐྱ་ཆོས་སྒར་དུ་སྐྱ་སེར་འདུས་པ་བརྒྱད་བརྒྱ་ཙམ་ལ་ལམ་འབྲས་ཚོགས་བཤད་གསུངས། ལ་དྭགས་སུ་ཐེངས་མང་པོ་ཞབས་ཀྱིས་བཅགས་ཤིང་དད་ལྡན་རྣམས་ཀྱི་རེ་བ་བསྐོང་བར་མཛད་པ་དང་། དེར་བཙུན་མའི་དགོན་པ་ཞིག་བཙུགས་ནས་རྒྱུན་དུ་བཙུན་མ་ལྔ་བཅུར་འཚོ་བ་དང་སློབ་གཉེར་ཐོག་གཟིགས་རྟོགས་མཛད་ཀྱི་ཡོད། ཕྱི་ལོ་ ༢༠༡༨ ཟླ་བ་ ༨ ཚེས་ ༦ ཉིན་གློ་སྨོན་ཐང་ཐུབ་ཆེན་དགོན་དུ་གློ་སྨོན་ལམ་ཆེན་མོ་བསྐྱར་གསོ་བྱུང་བའི་ཚོགས་མགོན་དུ་གདན་འདྲེན་ཞུས་པ་བཞིན་གློ་སྟོད་སྨད་དུ་ཟླ་བ་གཅིག་ཙམ་རིང་དགོན་པ་དང་གྲོང་སྡེ་མང་པོར་ཞབས་ཀྱིས་བཅགས་ནས་དབང་ལུང་དང་གསུང་ཆོས་བླང་དོར་བཀའ་སློབ་ཟབ་རྒྱས་སྐྱ་སེར་ཁྲི་ཚོ་མང་པོར་གནང་། ༧ སྐྱབས་མགོན་༧གོང་མ་རྡོ་རྗེ་འཆང་གིས་དཔལ་ས་སྐྱའི་ཁྲི་པ་བརྩིས་སྤྲོད་གནང་ནས་ས་སྐྱའི་ཁྲི་པ་གསར་པ་ཞིག་ཕེབས་ཡོང་དུས་མི་མང་པོའི་སེམས་ནང་མི་བདེ་བ་ཞིག་བྱུང་ན་ཡང་། ༧སྐྱབས་མགོན་གོང་མ་རཏྣ་བཛྲ་གང་ཉིད་ཀྱིས་བཤད་སྒྲུབ་ཟུང་གིས་རྒྱལ་བསྟན་སྤྱི་དང་དཔལ་ས་སྐྱའི་བསྟན་པ་རིན་པོ་ཆེ་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཇི་བཞིན་རྣམ་ཐར་སྐྱོང་བཞིན་པ་བཅས་ཀྱི་མཛད་པ་སྙིང་བསྡུས་སུ།