ས་སྐྱ་ཆོས་འཁོར་གླིང་གི་བྱུང་རབས་སྙིང་བསྡུས།

༧སྐྱབས་མགོན་༧གོང་མ་ཁྲི་ཆེན་མཆོག་ཆོས་ཚོགས་སུ་ཞབས་སོར་བཀའ་དྲིན་བསྐྱངས་པ།

སྤྱི་ལོ་༢༠༡༡་ཟླ་བ་༨་པའི་ནང་༢སྐྱབས་མགོན་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ས་གནས་འདི་གར་ཞབས་སོར་བཀའ་དྲིན་བསྐྱང་རྒྱུའི་ཞལ་བཞེས་བཟང་པོ་ཐོབ་པས་མི་མང་རྣམས་ལ་གསུང་ཆོས་གནང་རྒྱུའི་མཛད་རིམ་རྣམས་གངས་ལྗོངས་ཆོས་ལྡན་གླིང་གི་ཚོགས་ཁང་དུ་གོ་སྒྲིག་ཞུ་ཐབས་བྱས་ཀྱང་ཚོགས་ཁང་བསྐྱར་བཟོའི་ལས་གཞི་མུ་མཐུད་ནས་འགྲོ་བཞིན་པས་བྱ་ཐབས་བྲལ། ཚོགས་ཁང་གཞན་ཞིག་གཡར་དགོས་ཀྱང་རིན་གོང་ཧ་ཅང་མཐོ་བས་ཆོས་ཚོགས་སུ་དམིགས་གསལ་མ་དངུལ་གང་ཡང་མེད་ཅིང་རྒྱུན་ལས་ཚོགས་མི་རྣམས་ཀྱང་ཡུལ་ལུང་འདིར་ཕེབས་ནས་དུས་ཡུན་རིང་པོ་དེ་ཙམ་ཕྱིན་མེད་པས་དཔལ་འབྱོར་གྱི་ཁ་སྟབས་ཀྱང་ཡག་པོ་མེད། འོན་ཀྱང་སྐབས་དེའི་ཆོས་ཚོགས་ཀྱི་ཚོགས་གཙོ་ཁྲ་རིགས་དགོན་པའི་གྲྭ་ཟུར་ངག་དབང་ཆོས་འཕེལ་ལགས་དང་། རྒྱུན་ལས་འཇམ་དཔལ་ལགས། ཐར་ལམ་དགོན་པའི་གྲྭ་ཟུར་འཆི་མེད་ལགས། ཕུལ་བྱུང་ལགས། ཉི་མ་ལགས་བཅས་རྒྱུན་ལས་མི་ལྔས་མི་རེས་ཁེ་སྒོར་ཁྲི་རེ་སྔ་འདོན་གནང་ནས་ཏྲོ་རོན་ཏྲོའི་གྲོང་ཁྱེར་གྱི་དབུས་སུ་ཆགས་པའི་ཚོགས་ཁང་གྲགས་ཅན[Metro Convention Centre] ཟེར་བ་དེ་གཡར་ནས་མི་མང་ལ་གསུང་ཆོས་གནང་རྒྱུ་དེར་གོ་སྒྲིག་ཞུས། དེ་སྐབས་མགོན་པོ་གང་གི་ཆོས་ཕྱོགས་ཀྱི་མཛད་འཕྲིན་ཁག་ཤིན་ཏུ་ལེགས་གྲུབ་ཡག་པོ་བྱུང་བར་མ་ཟད་ས་གནས་མི་མང་སྟོང་ཕྲག་མང་པོ་ཟབ་རྒྱས་གསུང་གི་བདུད་རྩིར་རོལ་རྒྱུ་བྱུང་བ་དང་གོ་སྒྲིག་གི་ལས་དོན་གང་སྤྱིར་ཚག་ཚུད་ཡག་པོ་གནང་བར་མི་མང་ཧ་ཅང་མང་པོ་ཞིག་ནས་ཁོང་རྣམ་པར་ཐུགས་རྗེ་ལེགས་འབུལ་ཞུ་མཁན་ཡང་བྱུང་།

སྐབས་དེའི་ཚོགས་གཙོས་དབུས་པའི་རྒྱུན་ལས་རྣམས་རིན་པོ་ཆེའི་ཞབས་དྲུང་དུ་བཅར་ནས་ང་ཚོས་ས་སྐྱ་ཆོས་འཁོར་གླིང་འདིར་ཞབས་ཕྱི་ཅི་ཞིག་ཞུ་དགོས་ཀྱང་ཞུ་བའི་འདོད་པ་ཡོད། འོན་ཀྱང་ཆོས་ཚོགས་འདིར་དབུ་ཁྲིད་མཛད་མཁན་གྱི་བླ་མ་ཞིག་མེད་པས་དཀའ་ཚེགས་ཧ་ཅང་ཆེ་སྟབས། མ་འོངས་པར་མགོན་པོ་གང་ཉིད་ནས་ས་གནས་འདི་གར་གཏན་བཞུགས་མཛད་མཁན་གྱི་བླ་མ་ཞིག་སྐྱབས་འཇུག་བརྩེ་གཟིགས་ཡོད་པ་མཁྱེན་ཞེས་གསོལ་འདེབས་ཞུས་པར་རིན་པོ་ཆེ་མཆོག་ནས་དེ་དོན་གང་ཐུབ་མཛད་རྒྱུའི་ཞལ་བཞེས་བཟང་པོ་ཐོབ། དེ་ནས་བཟུང་ལོ་ཤས་རིང་ཆོས་ཚོགས་རྒྱ་བསྐྱེད་གནང་སྟེ་ས་གནས་གཞན་དུ་གནས་སྤོས་བྱེད་དགོས་བསམ་ཡང་དགེ་འདུན་པ་ཞིག་བཞུགས་མཁན་མེད་པས་བྱ་ཐབས་མ་བྱུང་། སྤྱི་ལོ་༢༠༡༤ལོར་༢སྐྱབས་མགོན་གོང་མ་རིན་པོ་ཆེ་མཆོག་སླར་ཡང་ས་གནས་འདིར་ཞབས་སོར་བཀའ་དྲིན་བསྐྱངས་པས་གངས་ལྗོངས་ཆོས་ལྡན་གླིང་དུ་ས་གནས་དེའི་དད་ལྡན་པ་མི་མང་སྟོང་ཕྲག་མང་པོར་སླར་ཡང་ཟབ་ཅིང་རྒྱས་པའི་དམ་པའི་ཆོས་ཀྱི་བདུད་རྩིར་སྤྱོད་པའི་སྐལ་བཟང་གི་གོ་སྐབས་ཐོབ། མ་ཟད་ས་སྐྱ་ཆོས་འཁོར་གླིང་གི་དབུ་ཁྲིད་དེ་ཆོས་བརྒྱུད་རིས་མེད་དང་བོད་རིགས་སྤྱི་མཐུན་ཚོགས་པ་མི་དམངས་བཅས་ཐུན་མོང་ནས་མགོན་པོ་གང་ཉིད་བདག་སོགས་་གདུལ་བྱ་ཡོངས་ཀྱི་སླད་དུ་སྐུ་ཚེ་རྒྱལ་བ་ཚེ་མཐའ་ཡས་པའི་ངོ་བོར་བརྟན་པར་བཞུགས་པའི་ཆེད་བརྟན་བཞུགས་ཟབ་རྒྱས་ཤིག་ཀྱང་འདེགས་འབུལ་ཞུས། སྐབས་དེ་དུས་༢མགོན་པོ་ཉིད་ནས་ས་སྐྱ་མཐོ་རིམ་སློབ་གྲྭའི་མཁན་པོ་སྤྱི་ཟུར་ཆོས་གྲགས་རྒྱ་མཚོ་མཆོག་ལ་ས་སྐྱ་ཆོས་འཁོར་གླིང་དུ་གཟིགས་རྟོགས་མཛད་དགོས་པའི་བཀའ་གནང་བས་མཁན་པོ་མཆོག་ནས་ལོ་གཉིས་རིང་གང་ནུས་ཞབས་ཕྱི་ཞུ་རྒྱུའི་ཞལ་བཞེས་མཛད།